ТАҶЛИЛИ НАВРУЗИ БАЙНАЛМИЛАЛӢ ДАР СУДИ КОНСТИТУТСИОНИИ ҶУМҲУРИИ ТОҶИКИСТОН
Имрӯз дар саҳни Суди конститутсионии Ҷумҳурии Тоҷикистон чорабинии фарҳангию маърифатӣ бахшида ба Наврӯзи оламафрӯз ба як шукуҳу шаҳомат баргузор гардид.
Чорабинии идонаро муовини Раиси Суди конститутсионии Ҷумҳурии Тоҷикистон ҳусни оғоз бахшида ҳамагонро ба ин ҷашни мубораку фархундаи байналмилалӣ табрику шодбош гуфт. Таъкид гардид, ки Наврӯзи Аҷам ва анъанаю суннатҳои неки он бо шарофати сиёсати башардӯстонаи Асосгузори сулҳу ваҳдати миллӣ – Пешвои миллат муҳтарам Эмомалӣ Раҳмон мавќеи ҷаҳонӣ касб кардааст, ки ин боиси ифтихори ҳар яки мо мебошад.
Ҷавҳари таърихиву фарҳангии Наврӯз саодату пирӯзии аҳли башар буда, инсонҳоро ба ҳамдигарфаҳмиву ҳамзистии осоишта, накӯкориву созандагӣ, дӯст доштану эҳтиёт кардани табиат ва неъматҳои он ҳидоят менамояд. Ин ҷашни бузурги бостонӣ таърихи беш аз панҷҳазорсола дошта, бо обу хок, марзу бум ва руҳи зиндагисозу тамаддунофари халқи мо пайванди ногусастанӣ дорад ва расму ойинҳои он дорои рамзҳое мебошанд, ки аз қадим то имрӯз бо рӯзгори мардуми созандаву ободгар ва фарҳангиву таҳаммулгарои мо созгоранд. Аз ин рӯ, бо итминони комил гуфта метавонем, ки «Тоҷикистон ватани Наврӯз аст».
Тамоми кормандони Суди конститутсионӣ Наврузи оламафрӯзро бо рӯҳи болида, рӯҳияи баланди миллӣ ва ифтихор аз давлату давлатдорӣ, худшиносиву худогоҳӣ, ҳамчун пайвандгари дирӯзу имрӯз, суннату анъанаҳои неки ниёгон, решапайванди наслҳо, бозгашт ба асли хеш ва эҳёи беҳтарин расму ойин ва анъанаҳои миллии халқамон таҷлил намуда, таманно намуданд, ки бахту саодат ва хайру баракат дар хонадони тамоми аҳли башар ва сулҳу субот дар тамоми олам ҷовидонӣ бошад.
Наврӯзатон фирӯз бод,
Ҳар рӯзатон Наврӯз бод!
